Ensera bansa Iban mali Tiong

Penti bansa Iban mali makai Tiong

           Nyadi kitai Iban dulu kelia, enda tentu ulih bepeda enggau bansa Kantu.Penusah tu bepun ari Sarapoh ti bula ke semaya enggau bansa Kantu. Sida Kantu suah ngayau bansa kitai Iban enda milih tuai biak tauka laki indu. Iya ga sida munuh enda ngira maya. Enti sida tepeda lebuh begigaka paku , tubu tauka nurun ngasu tekalanya mega sida Kantu munuh kitai Iban. Nya alai ba  rumah panjai Nasat din, bala Indu nangi enti deka  nurun begigaka engkayu sebelah babas. Munsuh seruran ngipa lalu munuh bala kitai Iban ti bisi ayan tauka dipeda nadai mayuh raban sebelah babas tauka umai. Nya alai, bala indu tebalan minta uluka sida lelaki ti endang berani sereta tampak rita.

            Bisi dua iku lelaki ke benama Ajau enggau Jangguk ti endang ditemu berani sereta kering ba rumah panjai nya. Orang indu ba rumah panjai Nasat segi enda berani nurun begigaka babas tauka nurun kumai enti dua iku bujang berani tu enda nguluka sida ke indu. Nya alai ba rumah panjai Nasat nya tadi , seduai iya aja ke pungka lelaki ke chukup berani. Mayuh mih lelaki di rumah panjai nya tang enda berani ngujika pengering diri. Dia sida bisi pemalu mimit laban bala orang indu nadai minta uluka sida turun,

            Nyadi di rumah panjai nya mega bisi siku lelaki ti benama Ranggung. Ranggung tu lelaki ti ngembuan tubuh ti tegap sereta tinggi. Dia dih iya ninga cherita Ajau enggau Jangguk tadi , iya lalu berasai pedis sereta enda lantang ati laban orang indu minta uluka seduai lebuah mansai , maku , nubu , enggau kumai ketegal rita seduai ti chukup berani tadi. “ Nama kebuah sida ke indu nya mai Ajau enggau Jangguk aja ? Aku pan lelaki. Aku mega berani” ku iya madahka aya Tuai Rumah sida iya. Bisi bala ke enggai ninga jaku Ranggung tadi lalu nyelenguttegal jaku iya kelalu balat ninggi diri , bisi ke enda arap tadi ketawa lalu mega bisi sida iya ngaga diri enda ninga jaku Ranggung.

            Pagi siti , kerebak tawas bisi sekeda bala indu ke ngingatka jaku Ranggung lalu sida minta uluka Ranggung nurun kumai. Mupuk mih sida ke tanah lalu ngereja pengawa sida baka mantun umai enggau begigaka lauk babas. Mata panas nyau majak manchar, dinga ta “ rari, rari, rari munsuh datai, parai kitai dibinsaika bala Kantu legi” ku indai Guan sida Ranggung serumah panjai. Ninga nya Ranggung lalu angkat mansang ngelaban bala munsuh. Ranggung belanda lalu nyintak ilang. Biau ke kanan baka ke ditebas kasak ke Ranggung, Biau ke kiba, lalu tegaring labuh ke baruh.Enda lama udah nya parai baru ga munsuh siku dipumpung iya, Ranggung lalu manjung ngangau ke orang bukai nadai ga nyaut. Datai munsuh siku lalu rebah sepengudah biau Ranggung enggau Ilang. Munsuh majak mayuh.

            Burung Tiong chapuh sereta inggar amat ba pun kayu enda jauh ari endur ke bebunuh nya. Ninga Burong Tiong inggar bendar munyi nya, dia deh bala Kantu ti agi ngelaban Ranggung tegepang, laban sida ngumbai nya bala Ranggung datai mantu iya.“Nya bala iya datai! Aram, rari kitai!” Pia ku jaku tuai bala Kantu. Bala Kantu ke agi idup lalu rari magang, laban ngumbai nya nyawa bala Ranggung datai ninga panjung iya ke kaung-kaung minta bantu.

            Ranggung enggau semua bala ke indu nya nadai apa nama. Sida lalu mulai Kediri ke rumah panjai Nasat. Gaga amai orang ninga rita pemerani  Ranggung ti ngalahka bansa Kantu. Nyadi maya tinduk malam nya, dia dih Ranggung tepeda ka bunsu Tiong. Ku iya “Tegal sah kami nuan menang ngelaban bala Kantu, lalu nuan agi idup. Enti bala Tiong enda bemunyi di puchuk ragai tebelian tadi, nuan tentu alah dijamah bala Kantu. Sida ke indu pan tentu parai magang dibunuh Kantu. Tegal saup kami Tiong, sida Kantu rari samua lalu kita enda parai. Nya alai, ku bunsu Tiong, “Kenyau sehari tu nyentukka  sida uchu-ambu, ichit-wit nuan jemah ila enda tau sakali-kali munuh Tiong. Kita enda tau makai Tiong. Barang sapa purih enggau peturun nuan, enti bisi makai Tiong, sida nya deka parai laban besi. Barang sapa indu ari purih nuan enti bisi munuh tauka makai Tiong deka parai beranak.”

Nya alai nyentukka seharitu agi mayuh kitai Iban mengkang mali munuh tauka makai burong Tiong.