PENGAWA BUMAI

DAYA IDUP IBAN

Pengawa bumai siti ari daya idup Iban kenyau ari dulu kelia nyentukka diatu. Bala aki ini bansa Iban kelia endang ngemeranka pengawa bumai betaun, nya alai semua pengidup sida bepusin ba idar pengawa bumai nadai saru. Penatai pemisi tiap-tiap ruang bilik bansa Iban endang asil ari pengawa bumai. Bumai tu mega tau dikumbai pugu daya idup Iban . Pengarap Asal Iban ba Bulan bisi Dua Belas Bulan.Peturun bansa Iban arapka Bulan tu tau nulung bansa sida maya bumai betaun laban enti salah pengengkah maya ke bumai dia padi enda nyadi ngujungka sida tau lapar pungkang.Nya kebuah orang ke tuai bejimat amat lebuh beratika bulan di langit maya menih tauka maya nugalka tegalan umai enggau maya ke manggul. ( Derek Freeman :1992 )

GAMBAR 1 : PIRING PANGGUL

Pengawa bumai bepun enggau Bulan Labuh Panggul iya nya  bulan Satu kitai Dayak tauka bulan Jun Orang Putih. Kandang mayanya endur bansa Iban berengkah deka manggul iya nya nganjung batu panggul (batu pengansah dibai ke tanah kena ngansah duku,kapak enggau beliung sekumbang nebas enggau nebang) sepengudah ti Begawai Batu.Orang ke tuai nemu maya ti betul ngengkahka pengawa manggul laban ti beratika pemansut “Bintang Banyak” di langit urung dini hari tauka meda kayu keruntang enggau dabai bebungai.Kereban ti dikena nitihka pantun bulan iya nya duku dikena kitai nebas babas tauka mantap urat-urat kayu.Bansa Iban ti udah manggul lalu ngetu seminggu.Maya ke ngetu, sida tau nangkal getah dikena ngambi belanja bepelasarka pantun bulan.  Kereban ti dikena maya pengawa tu iya nya batu umai tauka batu panggul.( Derek Freeman:1992 ). Pia mega, kitai mega tau ngupas alai betanamka leka utai baka leka jagung, ensabi, entimun, terung, enggau ke  bukai maya pengawa nasau.

Bulan Nasau bepelasarka pantun Bulan Dunging iya nya bulan Dua kitai Dayak tauka bulan Julai Orang Putih. tu maya bansa Iban ti nebang tauka berimbaka umai.Kayu ti besai ditundan, nya baru ulih ditebang.Tundan dikena niki enggau endur bediri sekumbang ti nebang kayu nya ti ari atas bandir iya.Kayu ke disandihka sida endang agi mengkang disandih sebelah pun kayu tauka bandir pun kayu ke besai-besai.Bansa Iban ngena duku sereta beliung lajung nebas dikena ngupas alai betanam, nebas anak karas, munuh anak mempasan,netak randau-randau kayu.

 Kelimpah ari nya, pengawa bumai disempulangka enggau pengawa nebang nitihka Pantun Bulan Dunging ba bulan Tiga kitai Dayak tauka bulan Ogos orang Putih. Pengawa nebang kayu tu iya nya siti ari pengawa ngeluas umai tauka meresi palan ti endur bumai.Ba kandang maya tu, pengawa bala Iban ke nebang umai udah ba ujung pengawa nebang.Sida betebangka kayu ngena kapak, mantap kayu kedemba ngena duku. Kemaya hari tu, mensia tebalan agi bekenaka tinso lebuh nebang kayu laban ulih ngereja pengawa nya enggau lengkas agi sereta ngelempungka agi pengawa nebang kayu.

 Berindik ari nya, lebuh pengawa nebang udah tembu, reban umai diteju empa panas awakka rangkai. Timpuh tu disebut belanggangka reban tauka berangkaika reban lalu diteju pengelama sebulan. Reban ke udah chukup rangkai deka ditunu urung pukul 12 ngagai 2 ngalih hari, maya gaya hari udah chukup angat. Pengawa tu, nitihka Pantun  Bulan Dunging dikereja maya bulan empat kitai Dayak tauka bulan September orang Putih. Pengawa tu dipenyadika ambika reban ti deka ditunu nya rangkai enggau manah lalu ngelempungka pengawa maya kitai belabuh nunu.(Derek Freeman,1992). Kemarau bisi nyadi dalam kandang bulan tu laban menua bekelebun laban asap .Machis tauka buah sawit suah agi dikena lebuh betunuka reban ngambika jampat agi empa api.

sebedau nugal miring dulu enti nitihka pengarap lama

            Bulan lima tauka bulan Oktober orang putih kitai udah selabuh nugal padi bukit. Tu dikumbai kitai bulan nugal. Padi ti keterubah iya ditanam kitai iya nya padi pun. Reti padi pun iya nya, semacham benih ke dipilih lalu ditanam nampung-menampung ba bilik nya. Lebuh maya nugal padi pun tu patut dulu agi ditugal ari padi bukai. Bala Iban berengkah nugal udah bekau ke nunu.Lebuh nugal, Iban suah agi beduruk enggau pangan diri taja pan bisi ngatika diri.Lebuh ngelabuh ke benih, langkau endang udah digaga.Bala indu menih padi lalu bala ke laki nugal.Ba dalam pantun madahka, nugal anang kelalu jarang lalu benih anang besai enggai ka padi kitai rugi.Maya tu mega, kitai tau nanam ubi dikena nupi babi lalu tau mega ke dempa.Kereban ke dikena maya tu iya nya, tugal dikena bala ke laki nugal, seluk, sintung, dikena bala indu menih lalu tikai senggang dikena sida duduk belelak.

            Pengawa udah nugal tauka bulan ngelabuhka benih iya nya pengawa mantun. Tu dikereja kitai Iban ba bulan enam  Dayak tauka bulan November orang putih.  Maya bulan mantun tu, sida ke indu deka nurun mantun rumput ke tumbuh nisi padi. Pengawa mantun tu  ambika padi ke ditanam nya tau tumbuh enggau manah. Enti nyema kitai enda mantun rumputnya, endur kitai bumainya deka repa lalu penumbuh padi kitai enda tentu manah. Ambika chunto, padi kitai nadai isi. Ba bulan tu, bala Iban sama sereta nurun ke umai tumu pagi enggaika ari tinggi.Sida lalu mantun rumput ke bisi ba sebelah umai dia. Dalam kandang bulan tu, retak enggau entimun ti ditanam sida mega galak.Sekeda sida ke mantun nya bisi ngena jari lalu bisi mega ngena bikung tauka iluk. Tanggui mega kereban ti diguna maya mantun kena nyeliahka diri ari empa panas tauka ujan.Tanggui tu siti kereban baka selapuk tang bepayung ti digaga orang ari daun biru. ( Derek Freeman : 1992 ).

Padi ti benung murai

Beduduk ari nya, Bulan Begantung Senduk iya nya Bulan Tujuh Iban tauka Bulan Disember perintah. Ba bulan tu, padi bisi mega udah murai. Bala Iban maya tu nyau nadai pengawa deka dikereja lalu suah suntuk pemakai.Nya alai, nadai salah sida deka meli anak padi ngagai orang bukai.Maya tu mega sida tau bekereja getah pera dikena meli pemakai.Sida tau nanam bemacham utai lebuh lepa.

Kelimpah ari nya, Bulan Matah iya nya Bulan Lapan Iban iya nya Bulan Januari perintah. Dalam kandang bulan tu, bansa Iban tau matah ngena tambak nendak.Lebuh ti ninga burung bagak, reti nya sida enda tau bumai dia lalu pindah.Bulan tu,padi sida  mansau lalu setengah nya udah mirah. Ketuai bansa Iban lalu tau begerah ngagai bala sida serumah mai beduruk ngetau.Lebuh udah matah, sida lalu ngetu seminggu, udah nya baru tau berengkah. Udah bulan Matah, padi selabuh udah mansau kitai Iban deka nyendiaka raga, selabit, dikena ngangkut padi, ketap dikena ngetap padi enggau sintung dikena nyimpan padi. Sida mega ngena tekaran,lanji, timpa, raga, takin enggau ketap dikena maya ngetau. Bansa Iban tau beduruk seminggu ngetau ngambika jampat abis. Bulan tu disebut enggau sulu jaku Bulan Ngetau iya nya Bulan Sembilan Iban tauka Bulan Februari perintah.

Bulan Empalai Taya iya nya Bulan Sepuluh Iban tauka Bulan Mac perintah. Bulan Empalai Taya tu iya nya jerami tauka empalai ti udah repa bekau dipumai Orang ke indu lalu mai duku dikena ngambi buah taya ketegal ti udah repa laban jerami.Buah taya nya digaga ke ubung lalu orang ti landik betenun tau ngaga baju taya, orang ti landik ngebat tau ngaga pua kumbu. Pia mega, udah bulan Empalai Taya bulan kitai Iban ditangkan enggau Bulan Berangkut iya nya Bulan Sebelas Iban tauka Bulan April perintah. Ba bulan tu,bansa Iban nyau udah berangkut ke padi paya enggau padi bukit ke rumah.Sida ngena lanji enggau tekaran dikena ngangkut padi. Kepenudi, Bulan Kelelang iya nya Bulan Dua Belas Iban tauka Bulan Mei perintah. Ba bulan tu, bansa Iban ngaduka adat baru dikena bumai taun baru ila.Enggau nya, sida dulu ngiga temuda ti deka dipumai,ngusung pangan diri begigaka tambak burung dikena manggul ba taun baru bepelasarka Pantun Bulan Dunging.

 Adat enggau Penti pemali pengawa bumai dalam konteks Daya Idup Iban ti bisi ensepi biuh modernisma

            Dalam Bup Sereba Reti adat manggum reti atur tauka turan ti tebalan tauka udah teleba dikena. Pia mega  reti adat dalam Junior English Diksionari iya nya endang ke jelan tauka peneleba siku-siku mensia.  Penti pemali iya nya tagang adat ti diletak enda tau dikereja sekali-kali sekalika dilanggar laban nangika nya ulih mai pemedis ngagai kitai ke ngereja pengawa ke ditagang. Nya alai, ba awak tu aku deka nguseka senentang adat enggau penti pemali buma dalam daya idup Iban ti tebal agi udah parit biuh modernism. Reti modernisma dalam konteks tu iya nya, ubah pemansang ti udah ditapi dalam pengidup kitai baikka nya ari pengarap, sosial, cara berunding enggau pemansang  ari pengerembai ekonomi menua.

            Adat ti terubah ka dikelansa aku iya nya Gawai Batu. Nitihka adat kenyau ari kelia, kejang deka bumai, kepala taun enda tau enda baum betanya ka utai ke deka dikereja sida serumah ke taunnya,enti endur bumai udah ditetapka alai ba aum Tuai rumah. Gawai Batu enda tau diintu sengapa. Enti taun dulu ta renga asai , Tuai bumai deka mai orang ngenselan menua ke dikumbai Bulingka menua. Reti iya, enti taun ke dudi kitai beturut enda bulih padi, enda bulih puli nya baru kitai ngintu Gawai Batu. Nyadi enti menua digenselan, babi siku mesti dibunuh,anak itit siku, manuk siku kena miau piring . lalu tubuh orang ke ngereja pengawa nya enda tau kurang ari tiga iku. Tang enti nya apin chukup tau ngagai lima tauka tujuh iku. Endur sida ngenselan menua iya nya ba pun jalai umai. Lalu malam gawai deka nyadi, bala lemambang deka berengkah nimang. Sereta ngading ngena piring. (Benedict Sandin :1964). Nyadi ke diatu jarang kitai Iban beburung tauka dikumbai kitai pagan( Derek Freeman). Nya alai adat tu jarang dikemeranka kitai tebal agi kitai udah megai Pengarap Kristen. Dalam Bup Kudus Pemansut 20:3 Sepuluh Pengasuh Allah Taala madahka enda tau nyembah Petara bukai. Nya  meh entara biuh modernism ti beremakai bendar enggau Daya Idup Iban kemaya hari tu.

            Endang sigi udah adat bansa Iban ti begunaka penti pemali ba pengawa bumai.Penti pemali ti baka tu mih ngasuh bala Iban selalu beati-ati lebuh ngereja pengawa.Umai bansa Iban enda tau nadai panduk endur sida betanamka ensabi, rampu, lenga, entekai enggau sekeda utai bukai ti tau ke engkayu maya mantun enggau ngetau.Ketegal ti bisi ensepi biuh modernism, diatu jarang bendar kitai meda umai ti bisi panduk laban pemakai ke kena engkayu tau dibeli barang maya ba pasar.Pia mega umai ti udah diperesi deka ditugal maya bulan nya.Pengawa nugal tu pengawa ti berat lalu patut diintu enggau naka penyiru laban mali enti enda diintu enggau piring ading enggaika enda bulih padi.

Enti bisi burung ti ditemu ba tegalan tauka sebedau nunu, maya tu mega burung nya diintu lalu dikereja.Adat ti ngintu burung ba tegalan ngena piring, anding lalu munuh babi ke dipeda.Orang ti landik ba adat miring enggau bebiau baka lemambang suah dikangauka nyampi tauka nyengkelan tegalan lebuh maya nugal.Pengawa nugal enda tau enda berengkah sebedau mata panas niki.Udah badu nugal, bansa Iban lalu bebasu amau iya nya muai utai ti kamah udah badu nugal.Rengka ke dikena bebasu iya nya amau, upa tepus kempokbegulai enggau amau lalu diunsut ba tiang rumah ngambika padi galak ninggi tiang.Diatu, adat ti baka nya nadai entu dikemeratka rebak diatu.Sida nadai bepiring indah lalu terus ditugal.Sida mega nadai entu arapka burung laban nya adat lama.Maya nugal mega sida nadai bekangauka lemambang laban ketuai umai tau nyampi tegalan nya.

            Nitihka Chemaline (2011), bansa Iban enda tau nanam labu ba umai enggaika bala ari sida sebilik mati taun nya.Pemali ti baka tu dikumbai mali lebu.Iban mega enda tau nanam lia enggaika bala sida sebilik bisi buta taun nya.Penemu tuai madahka, umai mali diabas orang bukai maya pagi hari ti dikumbai mali pagi.Nya alai, orang ke empu umai nya dulu mansang ke umai lalu nugal sereta menih tiga lubang padi lalu makai tiga suap asi.Iya enda tau ditanya maya makai tiga suap asi laban mali sida sebilik bisi mati taun nya.Orang ti nanya iya makai, deka ditunggu ngena siku babi tauka siku manuk enggau benda sigi panding sereta duit dua ringgit.Laban empas ari modernism, bansa Iban nadai agi ngena adat ti baka tu ketegal pemansang dunya.Sida tau nanam sebarang utai ba umai dikena engkayu.

            Entara Pemali ba umai nitihka bup Adat Iban 1993 iya nya enda tau ngachau sekenyang tauka padi patah tauka padi paut. Udah nya kitai mega enda tau ngerusakka chemai tauka sami anak padi orang tauka belayan padi ba umai orang. Semua pemali umai bisi diterangka dalam Bup Adat Iban 1993 Pekara 74 nyentukka pekara 106. Bansa Iban mega enda tau enchuri padi orang sebedau mansau.Lia enggau telu manuk ari umai orang mega enda tau dichuri laban pengawa nya mali lalu deka ditunggu.Kelimpah ari nya, enchuri ikan ari bubu tauka ensenga ti ditan ba kandang umai orang enggau nebang kayu ba kaki umai orang mega mali lalu tau ditunggu.Diatu, pengawa ti enchuri nya agi mengkang laban nadai diukum tauka ditunggu.Pengawa ti nunggu orang ti salah nya nadai dikemeratka agi nya alai pengawa enchuri tu makin nyadi.Bala tuai-tuai rumah diatu enggai kiruh nunggu orang ti salah.Bansa Iban kelia mega arapka munyi-munyi burung lebuh ti deka bumai. Enti ninga Ketupung dalam kandang manggul, burung tu enda manah enti sida kala bulih padi ba tanah nya.Enti sida enda kala bulih padi ba tanah nya, burung tu manah laban ngayuka sida deka bulih padi mayuh ari tanah nya.Lebuh ninga burung Beragai maya nembuka tebang, burung tu enda manah laban ngayuka umai enda angus ditunu.Diatu, pengarap beburung nya enda dikena agi ketegal empas modernism.Bansa Iban diatu bepegai ba pengarap moden iya nya Kristian. 

Beduruk ngetau

            Kepenudi endar aku deka ngenang senentang daya idup kitai Iban ke selalu beduruk. Beduruk tu iya nya sistem pengawa dibalas enggau pengawa tauka betulung pengawa ngena gintir . Bisi siti sempama ti nyebut duruk iya nya duruk bubut enggau ruai. Kitai enda tau baka duruk dua iku burung tu laban mai kur ti enda manah iya nya malas budu enggau penyai. Ambika banding, aku beduruk seminggu ngetau enggau orang bukai udahnya sida mega deka nulung aku seminggu kena malas duruk nya tadi. (Derek Freeman:1992). Kemaya hari tu, jarang kitai Iban agi ngemeranka adat tu laban mayuh agi penanggul bukai enda ulih diseliahka baka bekereja ba menua orang. Tang pengawa begaji tauka bekuli tu tebalan agi dikereja orang kemaya hari tu. Pengawa tu dikena ngulihka jereki. Tu meh biuh modernism ti ngerekai dalam pengawa bumai kitai Iban. Enti kelia, kitai Iban semina bumai bukit aja, tang diatu kitai bisi bumai paya. Laban nyau nunda orang di nengeri. Bekenangka senentang gaji ti diberi maya bekuli, enti suba RM3 sehari (Derek Freeman) tang diatu RM20 sehari.  Nya alai,endang mayuh endar empas modernism tu ti bekaul enggau pengawa bumai kitai Iban.

PELASAR DAYA IDUP ENGGAU LITARICHA IBAN

NOT MINGGU 5

M5     Empas biuh luar ngagai pengawa ngayap( Iban Courting )

Ø  Pengawa ngayap tu adat  asal iban ti dikemeran ka orang menya.Adat tu nyelai sereta unik bebanding enggau adat bansa bukai. Nya alai nadai definisyen ti nyengala engkeman dikena ngerintaika adat ngayap tu (Micheal Buma 1987:22).

Ø   Bepelasarka bup Waris Daya Idup Iban vol 2 ti ditulis Dr Chemaline anak Osup adat ngayap  tu ngenang pengawa orang lelaki ti datai ngagai peninduk indu dara maya jauh malam(benung orang tinduk) laban deka bekelala enggau indu dara nya sereta madaka pengerindu ati diri ti deka besulu enggau indu nya enti nyema indu nya deka nerima iya ke pangan.

Ø  Maya ngayap nya mih, seduai berandau  dalam kibung enggau pangan diri belalauka basa ti alus sereta besenutuk enggau pemaik  ulah ti dikemeranka kitai Iban dulu kelia.

Ø   Dalam atur adat ngayap tu,lelaki enda tau ngayap indu nya lebih ari tiga malam beturut-turut. Tuju ngayap tu kebendar  iya endang dikena lelaki enggau indu nya bekelala lalu ngemunka danji nirika rumah tangga enti seduai sama keran,pengerindu udah beserangan lalu setuju idup segulai sejalai.

Ø  Kedua-dua seduai iya nemu pengawa ngayap tu enda tau disempulang enggau pengawa beleman laban seduai apin jadi. Lelaki enda tau sepeneka ati deka beleman enggau orang indu,pia mega indu enda ngemudah nya nyerah kediri ngagai orang laki. Nya mih, pengalus  basa adat ngayap menya. Selalu iya, sepengudah duai bela setuju deka segulai dia dih duai madah diri deka nirika rumah tangga.  Iya ke lelaki ngasuh Indai enggau apai iya beributka jaku(mesu) lalu ngatur adat melah pinang nitihka adat Iban

Ø  Jeman diatu, adat ngayap udah enda relevan agi dikena laban taun nyau majak bekalih. Menua nyau makin moden, rumah panjai nyau semin magang. Jalai ti moden dikena orang madah ke pengasai ba ati din.

Ø  Ketegal arus pemansang ti majak nyadi ba dunya tu,  mayuh empas ti nyadi ba raban bansa enggau daya idup iban ketegal biuh luar ti suah ditunda kitai ari menua bukai. Keterubah iya aku deka ngenang empas biuh luar ngagai pengawa ngayap. Bepelasarka genteran di atas, dia dih kitai nemu pengangkun adat ngayap dulu kelia.

Ø  Kemaya hari tu, mayuh orang saru penemu senentang adat ngayap ti endang adat asal kitai iban. Nama kebuah? Laban sida iya ngembuan runding ti negatif. Sida iya udah alah parit daya idup orang ribai ti suah ngenataika runding ti enda menuku.Dalam bup Waris Daya Idup Iban vol 2 dia dih Dr Chemaline bisi meri chunto orang ke jai penemu tauka ngembuan pikir negatif.Ambika banding, pengawa nyengkubang bilik apai indai indu sereta enchuri tauka naban ngerinan barang tauka reta pesaka ti berega maya ngayap. Tu ulih ngujungka penyarut nyadi laban sida enda nemu atur adat ngayap ti ditelusur bansa Iban empu bejeman-jeman ke udah.

Empas pengawa ngayap

suba

Ø  Ngayap sida ke lelaki maya malam

Ø  Sida ngiga indu nyadi ke bini enggau pengawa ngayap

Ø  Sekalika indu nya deka tauka enggai

diatu

Ø  Diatu udah bisi kereban telekomunikasi endur berandau baka telipon, laman pemerindang baka Facebook,wechat,whatapps,line, beetalk,twitter enggau ti bukai

Ø  Pengawa tu endur sida madahka diri rindu ke pangan diri

Empas Ngayap ngagai pengidup 

Positif

Ø  Undang – undang adat Iban (1993) ngayap semina bansa Iban aja. Bansa bukai enda tau

Ø  Ngerapitka kaul entara pangan diri

Negatif

Ø  Mayuh ulah ti enda menuku nyadi baka beleman

Ø  Perening bansa bukai ti enda tentu manah agai pengawa ngayap laban sida enda nemu bakani adat ngayap dipejalaika

Ø  Pengawa ngayap udah nadai agi dikemeranka orang jeman moden tu

Empas biuh luar ngagai pengawa ngayau( headhunting)

Ø Ngayau tu iya nya siti ari pengawa dalam adat asal bansa Dayak Iban kelia ka bepun ari penatai asal bansa Dayak Mengayau ari menua Kalimantan Barat, Indonesia. Nyadi pengawa mumpung pala tu dikumbai kitai ‘bedengah’ lalu sida ke bulih pala nya digela “bujang berani” laban sida udah mandangka penyikar sereta pemerani sida.Nitihka rekod sejarah dalam  bup Waris Daya Idup Iban vol 2 bisi dua bengkah kayau ti nyengala iya nya  ke dikumbai “Kayau Serang” enggau siti agi bansa kayau nya dikumbai orang "Kayau Anak" ke balat di ketakut ka orang kelia.

Ø   Lalu reti “Kayau Serang tu iya nya bala sida mansang bebai ka bala mayuh ngagai menua munsuh ka ka dialah ka sida, lalu ngena aum nesau bala orang ari rumah panjai bukai. Lalu reti "Kayau Anak" tu dikereja orang ke nurun mansang ngayau betubuh mimit kira ka nadai sampai dua puluh iko. Sida iya nurun ngayau ngipa orang orang ke mansang turun ngagai umai, orang ke benung mandi, orang ke benung begiga ka paku tubu tauka benung mansai nubai. Sida iya nadai tentu ngena batang aum tang ngereja pengawa tu ngena chara ngerampas.

Ø   Nya alai kitai kala ninga ba cherita tuai, orang kelia ke mansang ka umai sigi bisi dijaga lalu disempulang bala pungka lelaki laban nangi ka diri ulih bunoh orang laban kayau anak. Uji bacha kita ba cherita “Peturun Iban” ba bagi “Bansa Seru” ke bisi ngenang uchu Demong ke nyadi ketuai bansa Iban ba menoa Paku ke benama Belaki, ke parai dikayau anak bansa Seru leboh sida bumai ba menoa ke dikumbai Tanjung Kundong benung sida turun mantun. Sama mati enggau iya, iya nya bini iya ke benama Beremas (Menyadi Uyut bensumbar Bedilang Besi) enggau ipar iya ke benama Kadir
Tang bansa Seru nya ulih digagai ka bala pungka lelaki sida serumah ke benama Jimbai, Umar, Jelema enggau Buma, lalu mati di bunoh benong bansa Seru nya ngetu niki buah engkeranji ba menoa Bukit Tampak Panas ke nyau ikak rari naban ka pala Belaki.

Ø  Lebuh udah pulai ngayau tu, orang ke udah menang ngalah ka munsuh lalu enda tau enda mumpung pala munsuh ke udah mati dibunuh sida sereta lalu ngerampas reta tengkira munsoh sereta mega lalu nangkap bala munsuh ke agi bedau idup nya lalu dibai pulai diambi nyadi ka ulun sida leboh munsoh nya tadi udah datai ba menoa sida ke udah menang ngayau nya. Lalu kala mega sida ke ngayau tu lalu ngambi anak umbung munsuh sida nyadi ka bini. Empas pengawa ngayau iya penyarut ti majak nyad iba dunya. Nyema ba mata, menua Palestin enggau Israel ti enda ngetu bemusuh sereta bebunuh enggau pangan diri. Bekena ke senyata tajam. Ngena bum meriam. Senapang moden baka “m16”.

Ø  Nyadi pengawa Ngayau tu diketu ka ari atur perintah menoa Indonesia ke dipegai bansa Belanda ti dikumbai sida iya “Perjanjian Tumbang Anoi” ba menoa Damang Batu dalam taun 1874.

Ø   Lalu baka nya mega ba menoa Sarawak pengawa Ngayau tu diketu ka perintah nitih ka atur Perintah Menoa Sarawak ti dipegai Raja Vyner Brooke dalam bulan 12 taun 1932 udah bekau perintah ke ngayau ngalah ka tuai bansa Iban ke benama Asun, Kana enggau Kendawang dalam menoa Ulu Batang Ai nitih ka tampung ba cherita ti ditulis niang Benedict Sandin ba surat ti dikumbai iya “Peturun Iban” dalam taun 1962. ( Nalong anak Buda enggau Johnny Chuat : 2011)

Ø  Kayau kayan ( The Great Kayan Expedition) kena 15.5.1863

Ø  ‘Bebanchak babi’ di Kubu Sylvia , Kapit 16.11.1924

Ø   Tanda Bansa Iban enggau Orang Ulu bebaik lebuh Charles Vyner Brooke nyadi Rajah Sarawak

Empas pengawa Ngayau

Suba

Ø  Bulih pala munsuh lalu bulih dengah

Ø  Dikena ngetas ulit orang ke udah nadai

Ø  Mantaika pengering

Ø  Dikerinduka orang indu

Diatu

Ø  Orang berebut begigaka penyenang enggau pengeraja

Ø  Semua suku raban bansa ulih beserakup magang

Ø  Regatta digaga dikena mandangka pengering dlm  Pengawa belumba perau

Empas  biuh luar ngagai pengawa ngulit

Ø  Pengawa ngulit tu di Belabuh ari Serapuh diajar ulih antu puntang raga, laban sida ti berunggu mayuh amat mati. Diajar meri baya chukup-chukup, diajar ngulit ke ditampung kitai diatu.( bup Waris Daya Idup Iban vol 2)

Ø  Reti pengawa bejalai ke ulit tu iya nya di kerja orang ke udah kena tinggang penusah pemati ti nyau ka ngereja pengawa ngetas ulit tauka muai ulit. Pengawa tu di kerja sebedau ulit nya di ketas.

Ø  Kebuah pengawa tu di kerja iya nya kena benyamai ke isi tauka ati orang ti udah kena penusah nya tadi.Kati Gaya Pengawa Bejalai Ka Ulit Tu Di Kerja Nitih ke pengawa ti di kerja kelia menya, orang ke bejalai ka ulit tu iya nya nurun Kayau Anak, ngiga pala munsoh kena nyilih tubuh niang ti baru udah parai ninggal ke sida ti ka di buai ulit nya ila. Tang laban kitai kemaya hari tu nadai agi bemunsuh, nadai bebunuh .Nya alai, pengawa bejalai ka ulit tu di kalih ka enggau penurun orang ti ke kala udah alai orang ngayau tauka orang betempuh serta bebunuh kelia menya.

Ø  Kira seminggu sebedau ulit nya ka di ketas dia orang ke beempu pemati nya ka nesau sida sekaban mai baum ka bejalai ka ulit. Leboh ti baum nya sida iya ka netap ka ngagai menua ni alai sida iya ka bejalai begiga ke sumbok isang leboh ti bejalai ka ulit nya ila.

Ø  Sida iya mega ka bepilih ka bagi orang ti patut enggau ngereja pengawa bejalai ka ulit nya ila, laban enggai nyadi tak sebarang orang bai enti orang nya bedau tuai umur lalu mesti lelaki. Ba menua kami di Brayang, Roban bedau kala orang indu udah enggau ngereja pengawa bejalai ka ulit. Menua ke selalu di gagai kami semenua iya nya baka Bukit Sadok (alai Rentap betempoh ngelaban perintah Charles Brooke), Bukit Bangunan (selalu alai  saldadu betempoh ngelaban komunis), serta enggau Bukit Kelingkang (selalu alai saldadu betempoh enggau komunis sereta kitai Iban kelia belaban bebunoh enggau orang ari menua Indonesia).

Ø  Kediatu,  biuh luar ti bisi dikemeranka kitai iya nya. Bansa pengagarap ti dikembuan sebengkah-sebengkah bansa  ti enda sama ba dunya tu. Sida Portugal nyerang menua Melaka taun 1511 lalu ngajar pengarap Kristin. Nya alai kitai ke bansa iban ketebal agi bepengarap Kristen diatu. Nyau jarang kitai ngena adat lama. Bisi pan makin kurang. 

Empas pengawa ngulit

      Pengarap

Ø  Diatu orang ngintu ulit ngena jalai sembiang

Ø  Sembiang rosari ( Roman Katolik )

Ø  Sembiang 100 hari udahnnadai

      Sosial

Ø  Nadai penti pemali – tang kitai mesti bebasaka sida ka beempu ka pemarai

                                      Empas ngagai pengawa nyabung (cockfighting)

Ø  Nyabung manuk endang siti main asal iban.Dulu menya , pengawa nyabung tu dikena orang bebuti aja sereta nadai be entaruhka duit baka ti dipeda kitai kemaya hari tu. Uti nyabung manuk kelia semina beentaruhka bangkai manuk aja. Reti iya, manuk orang ti alah nyabung nya deka diempu orang ti menang, enda ngira manuk nya idup tauka udah mati( Datul Micheal Buma,1987:47).

Ø  Main asal ti dikumbai nyabung tu dipejalaika ba siti menalan ti dikumbai balai nyabung tauka kelang sabung. Dulu kelia, nyabung manuk seruran dimain tiap kali bala Iban ngaduka Gawai Antu. Iya selalu digaga sehari sebedau Gawai  Antu nyadi,iya nya sepengudah asi pulut ti dilulun sida mansau tang ba hari nyadi gawai antu,main nyabung manuk tu digaga ba tanju tuai rumah panjai ke alai orang begawai antu nya. Diatu orang nyabung, ba kelang sabungukai ta semina iban aja tang bansa bukai pan bisi mega enggau nyabung manuk.

Ø  Enti dulu menya,uti sabung nya besangkut enggau adat rumah panjai dalam daya idup iban tang diatu nyabung manuk nya nyau nyadi siti pengawa komersial ti belisin. Dulu menya, orang nyabung manuk belabanka pengelandik enngau pengering manuk aja enda bak adiatu ngena ubat(steroid) baka ke seharitu. Bekau biuh luar ti tau dikenang kitai dalam pengawa nyabung tu iya  ya pengaa betiu tauka bejudi. Sida mega nyau enda entu ngemana ke tuju ti kebendar deka nyabung munyi ke dipadah ba genteran ba atas. Dalam bup bup Waris Daya Idup Iban vol 2)

Empas pengawa nyabung

positif

Ø  Ngetanka daya idup

Ø  Dikena bebuti

Ø  Ngelala bansa manuk

negatif

Ø  Bejudi – ngambihka duit

Ø  Belaya

Ø  Nemu bekenaka taji

Ø  Meri kur ti enda manah ngagai nembiak enti salah chara ngajar pengawa nyabung